hiking100fun

各位行山隊友及有興趣參加既朋友:

來緊12月28日既行山團, 我地會去行位於港島區既港島徑第八段, 但此行乃非全第8段之行, 只係由土地灣開始行, 途經 [龍脊], 至大潭峽懲教所馬路為終點。

行山路線: 港島徑第八段 (非全段之行)
行山日期: 12月28日 (即下周日)
集合時間: 上午9點正
集合地點 :筲箕灣巴士總站的新巴 9 號站頭
起點: 土地灣
終點: 大潭峽懲教所馬路
行山時間: 約 3 小時
難度: 2 星級
路線詳情: 由石澳道起步，沿小徑上行至打爛埕山脊，循山脊北行抵達打爛埕山頂，山勢起伏，此為有名的港島『龍脊』。往北行，沿歌連臣山山腰小徑行至大潭峽懲教所馬路，至此處為終點。
參考網站：http://www.wchu.com/hiking/hikingdetail.php?id=8

團長後記：

今朝早雖然天陰陰好似就快落雨咁, 但呢種天氣一d 都冇影響大家既雅興, 大部份隊友於9點左右相繼到達集合地點”筲箕灣巴士總站”, 只不過係有3 條粉腸, 遲到大約15分鐘吧! 幸好係等嗰3 條粉腸期間, 阿 Yan 同 Yan So 以 自家製既 Blueberry Cheese Cake 去招待大家. 多謝! 多謝! 再多謝!

於 9:20am, 我地一行22人便登上新巴9號, 基本上, 巴士上層差唔多比我地呢班俊男美女包晒黎坐咁濟, 而其餘幾位不知名既乘客, 只係鵪春地坐係最前既一兩排, 講起今次我地既行山團隊, 呢次可以叫做係有史以來最多女隊友既一次, 共有9位女隊友參加, 今次冇黎到既人, 真係恨都恨唔到.

因 我地坐嗰架巴士以生死時速片入石澳道, 好快我地便到達上龍脊既起點 “土地灣”, 一如上次行山, 今次 Michael 又再攞出佢既毒門暗器 “八爪魚腳架”, 用黎 set 機替大家拍攝團照, 多謝Michael 又一次無私咁冒着跌爛部 D700既風險兼用佢既5秒自拍神功去幫大家影團照.

之 後, 我地既靚仔領隊方中信為大家介紹咗今次既行山路線, 我地於約 9:50am 便開始踏上港島徑第八段 (非全段) 之行, 而一開始又係上石級, 但雖則要行一粒鐘到先上到龍脊, 但石級數目比起上像中少及易行, 方中信開頭一馬當先, 跟住落後, 但好快又追得上大隊, 我地行咗約廿分鐘到, 到咗一個涼亭小休, 又再麻煩 Michael 幫大家影團照, 不過今次係用10 秒自拍神功, 因佢今次要跳欄.

我地一路行一路吹水, 沿途景色壯觀而秀麗, 於10:45am 左右, 相繼到達龍脊, 而今次方中信因有眾多美女隊友在場關係, 竟然冇包尾, 有圖為證!

點解有班人咁睇唔開呀?

到達龍脊, 雖則風大, 幸好冇吹甩任何隊友既頭, 只係有某人吐啖差點比打成雨粉, 吹回某些隊友臉上.

我地又再影團照後, 再繼續上路, 途中又有 Yan So 批梨比我地食, 又有零食精 EVA 小姐請我地食零食, 真係爽極!

行多約 40分鐘到, 我地巳到達平路, 向終點大潭峽懲教所馬路進攻, 雖然我地係行緊山, 但大家並冇忘記 AV, 沿途大家談及投影機, 同相機, 我地呢班男隊友, 始終都係一班機佬!

到約 12:30pm 前, 我地一行 22人, 終於到達終點, 跟住好快就有9號巴到站, 係下午1 點前, 我地返到去筲箕灣巴士總站, 跟住阿 6同阿7 邀請大家一齊去黃林記食午餐, 不過所有食物及飲品都係 AA制!

食完黃林記既片頭河後, 我地便依依不捨咁各自歸家.

多謝各位隊友參加2008 年最後既一次 Fun Hiking, 大家係 2009年再見!

係小弟同老細回家途中, 發現一樣怪事, 點解今次行完山後, 小弟既 backpack 比出發前仲重咗既?

哦! 原來係咁!

多謝方中信借比我既 漸變 filter!

多謝 Michael 借比我既 BD!

多謝Alexchrome 比我既 Nikon 小腳架!

多謝 Boris510 比我既小地圖!

嘩! 今日收獲十分豐富!

寫到手軟! Report pencil!

Tags: hiking100fun活動, 港島徑

This entry is filed under 香港島. You can follow any responses to this entry through the RSS 2.0 feed. You can leave a response, or trackback from your own site.