Archive for the ‘大嶼山及離島’ Category

漫遊南丫島

Saturday, November 12th, 2016

因為九巴新開了上水到中環 IFC 路線,加上原上水到灣仔線加開了分站在中環四號碼頭外,令上水到南丫島及長洲變得非常方便。這次本來計劃到梧桐寨看瀑布,奈何 Joan 忘了帶行山鞋,最後選擇了一條波鞋也可以走的行山徑。

約下午一時抵達南丫島榕樹灣,先到龍華酒家祭五臟廟,龍華的鼓油王炒麵也不錯,但仍及不上谷埔松記。榕樹灣至索罟灣是一條十分繁忙及易行的山徑,又名南丫島家樂徑,除了當地居民穿梭來往外,還會遇上許多內地遊客。

家樂徑近榕樹灣比較多小舖,近索罟灣除了海鮮舖外,還有賣地道海產店舖。中途經過一個賣蜜糖的大叔,他的居所及蜂巢就在小檔的後面,看似原味純正無添加。問起蜜糖的問題,大叔侃侃而談他的威水歷史,還請我多喝一杯蜜糖。

抵達索罟灣時約三點十五分,離回港的船期還有半小時左右,但碼頭已經有幾十人在排隊。上船返回中環碼頭,Joan 要趕回家洗澡出席晚宴,我便乘坐九巴新開的 673 巴士返回上水。

集合地點: 不適用
起點: 榕樹灣
終點: 索罟灣
行程:2 小時
里數: 5 公里
難度: 1 星級
時間: 2:00 pm
領隊: 韋信
團員: 韋信, Joan
地道美食:龍華酒家

map

 

Taken by Leica M9P with Summicron 35/2

南丫島模達灣與石排灣

Saturday, May 16th, 2009

從香港仔乘船到模達灣,上岸後沿左面的水泥路走,途經一些半荒廢的村莊,用不著上坡落斜(當然微微的上下坡路還是有的),大約個多小時,南丫島最長的沙灘 ─石排灣就會展現眼前。沿途會經過模達村、榕樹下村、東澳村等。

集合地點: 香港仔
起點: 模達灣
終點: 索罟灣
行程: 2.5 小時
里數: 5 公里
難度: 1 星級,平路易行
日期: 2009-05-16
時間: 12:14 am
領隊: 韋信
團員: 禮禮、豆豆、老汪、Man、Annie、Catherine、Carol、Maggie
地道美食:天虹海鮮酒家


« of 2 »

東涌至大澳

Saturday, May 2nd, 2009

今次行山路線是由大嶼山的東涌行至大澳,全程由約十二公里 (東涌 ─ 散頭 ─ 鱟殼灣 ─ 沙螺灣 ─ 散石灣 ─ 深石村 ─ 深屈灣 ─ 大澳)。東大古道連接大嶼山東涌與大澳,沿岸途經(石散)頭村,沙螺灣,深屈等地方,是昔日的交通要道。現在,這條古道的大部份已舖了水泥,上落也很小,並不難走,在深屈還有士多補給呢!終點大澳被喻為香港的威尼斯,是充滿水鄉風情的漁村,以棚屋(在水上用竹棚撘建的)最具特式;我最喜歡大澳的茶果,是一種點心,到處也可以買得到,價格很便宜。大澳是觀賞日落的好地方,只要細心等待,不難看到如鹹蛋黃般的日落;我建議大家行完東大古道,不要急著離開,可能可以看到意外的驚喜呢!

集合地點: 東涌東薈城
起點: 東涌炮台
終點: 大澳
行程: 4 小時
里數: 12 公里
難度: 1 星級,大部分石屎路,後段有一部分泥路。
時間: 9:00 am
領隊: 韋信
地圖: 地圖連結
地道美食: 深屈灣坤叔士多

« of 3 »

 

Courtesy with Boris

 

« of 6 »

 

Courtesy with Geoff

 

 

長洲環島遊

Saturday, April 11th, 2009

各位行山隊友及有興趣參加既朋友:

Hiking100fun 四月份第一個行山活動訂於星期六 4月11日舉行。

今次行 山路線係位於大嶼山東南面、芝麻灣對開的長洲,距離港島只有11公里,是人口最稠密的離島之一。從前長洲是個漁村,到現在長洲仍然保留著很多漁村的傳統。 長洲有8個灣,分別是東灣仔、東灣、觀音灣、南氹灣、西灣、長洲灣、白鰽灣和大貴灣。島上開設了很多特色食肆,不單有漁港特色的海鮮酒家,也有不少西方色 彩濃厚的酒吧和餐廳。

長洲大致上是沒有車輛行駛的,島民都是徒步或踏單車代步。

是次長洲之旅分兩段進行

早上行藍線
長洲碼頭→東灣海灘→滑浪風帆紀念公園→東灣石刻/小長城→觀音灣→天后廟→關公忠義亭→長洲碼頭

中午在碼頭附近食海鮮

下午行綠線
長洲碼頭→北帝廟→長洲消防局→製冰廠→長貴路→桂濤花園→長北路→觀景亭→大貴灣新村→北帝廟→長洲碼頭

是次行程由團友 Amanda 策劃,由星級領隊方中信帶隊。有興趣參加當日行山既隊友或朋友,請儘快或於下個星期三的下午5點正前於指定網站報名,新朋友如想參加,可以直接聯絡韋信或小弟。

行山路線: 長洲之旅
行山日期:4月11日
集合時間: 上午9點正﹝搭9點半船﹞
集合地點: 中環碼頭
起點: 長洲碼頭
終點: 長洲碼頭
行山時間: 約4至5小時
地道美食:地道小食

截止報名時間為四月八日的下午5點正,請儘快報名. :love_china: :love_china: :love_china:

 


GPS Log:

Photo courtesy by Alex

 

Photo courtesy by Boris

 

« of 4 »

 

南丫島環島遊

Sunday, January 11th, 2009

來緊2009年, Hiking100fun 第一個行山團會係1月11日, 亦即下個星期日舉行, 今次會去行南丫島, 由索罟灣起步繞行菱角山一週,返回索罟灣後再向榕樹灣進發, 而索罟灣至榕樹灣之路線是遊人來往榕樹灣及索罟灣的必經之路,沿途除可欣賞洪聖爺海灘的海岸生態,更有機會於索罟灣泥灘找到招潮蟹、彈塗魚和小白鷺等生態小動物。其次,你還能在短短的路程上參觀榕樹灣天后廟及索罟灣天后廟,在索罟灣海邊一帶更會見到據說在二次大戰時日軍把多艘快艇匿藏作戰的神風洞, 當到達榕樹灣後, 便於當地的酒家共進海鮮午餐。

有興趣參加當日行山既隊友或朋友, 請儘快或於下個星期四的下午5點正前報名, 領隊韋信遲些會出連結比大家報名。

行山路線:索罟灣至榕樹灣
行山日期:1月11日 (即下個星期日)
集合時間:上午8點10分
集合地點:中環碼頭 (係往索罟灣的碼頭外等侯)
起點:索罟灣
終點:榕樹灣
行山時間:約4小時內
地道美食:建興阿婆豆腐花、民豐海鮮酒家

如有任何人怕行石級或太辛苦, 可乘 10:20am 往索罟灣, 於11:00am 跟大隊會合去榕樹灣, 但一定要預早告知大隊.

路線圖:



Photo by Michael:

 

« of 3 »

團長後記:

尋日早上7點幾出門口, 雖然係10度左右, 但小弟都唔覺得太凍, 因為尋日係 Hiking100Fun 於2009年舉行行山團既第一炮, 所以小弟個心高興如火! :clap2hands :clap2hands :clap2hands

小 弟係 7點40分巳到咗 去南丫島索罟灣既4號碼頭, 之後便同方中信及Michael 去麥記食咗個早餐, 係8:15am 返到碼頭時巳見到正係到食緊糯米雞既 lhk 同埋佢既女同事, 而則邊就有幾乎瞓過龍既初哥及最早到既車厘子小姐, 冇幾耐之後 Bono, Yan Yan, Yan So, Gundam, Gundam So, 同埋方中信既 friend 都係 8:25am 前到達碼頭.

但係此時我地仲未見到妄煮, 於是乎 call 佢, 不過, 竟然係冇人聽! :a007:

心知妄煮更係仲係張床上發緊綺夢唱緊波兒 … 波兒 … 波兒 … … :a002:

算啦! 我地一行13人上船啦! 本應 Ruby 都會黎但Michael 話佢唔係太舒服, 所以佢亦臨時甩底! 希望 Ruby 快 d 好番啦! :love_china: :love_china: :love_china:

話說係由中環去索罟灣既船程中, 小弟同方中信同佢既 friend 傾緊相機時, 突然前排既大嬸插嘴讚美方中信手上既古董相機, 夠竟呢位大嬸係欣賞方中信手上既古董Contax 相機, 定係欣賞風度翩翩文質彬彬既方中信呢? :struggle:

係 約 9:10am, 大隊便到達索罟灣, 等幾位隊友放等幾兩後, 我哋便影團照, 呢個咁神性既任務, 更係又由至識嘆世界既雪茄王 Michael 大大負責啦! 只要 Michael 一攞出佢既毒門暗器 “八爪魚” 及 D700, 大家便自動自覺排好位等影相, 多謝 Michael 哥! :sorry: :sorry: :sorry:

影 兩張相後, 大隊便開始上路, 過咗一列酒家, 小賣店, 及天后廟就踏上索罟灣家樂徑, 行咗一陣就要上石級同上斜, lhk, 女同事, Yan Yan, Yan So, Bono 等更係行係最前嗰批啦! 而後邊嗰批唔使講都知係邊幾位啦! 因為我哋係機佬要影吓相嘛! :ebsmile: :ebsmile: :ebsmile:

係約10點半前, 所有隊友都上到菱角山上既涼亭, 四周風和日麗, 當中有隊友竟然離隊, 原來係阿 Yan同 lhk表現體力既時間, 佢地兩個跑上對面山頭, 此時我亦再一次打比妄煮, 佢終於以半夢半醒既聲音接聽我既電話, [團長, 唔好意思呀!] 咁我就明白尋日冇人請食飯了! :042: :042: :042:

於是乎我用 Walkie Talkie call 返兩位猛男歸隊, 向石排灣進發, 在向下行之際, 得悉原來女同事係小弟既校友, 呢個世界真係細! :modlaugh:

到石排灣後向榕樹下行之際, 竟然發生了少少意外, 要出動小弟同各隊友行山以來都未用過既急救包! :a005:

點解要出動到急救包? 原來有位女隊友露底, 唔係, 係甩底, 係甩鞋底至啱!

當小弟得悉此事後, 小弟於是乎取出急夠包內既白膠布, 幫該位女隊友隻鞋做咗個小急救, 再加上 Gundam 咁啱有條索繩, 於是乎呢個甩鞋底危機可以即時化解, 之後便再向模達村進發. :ebsmile:

到咗模達村後, 小弟買咗些楊桃同隊友分享, 雖然浸桃皮 d 味又 d 苦苦地, 但桃肉味鮮多汁, 非常解渴, 怕酸既車厘子小姐見初哥食到咁滋味, 終於都比面試返個. :modlaugh:

食完楊桃後, 就係玩毒人遊戲時間, 方中信竟然叫 Gundam 攞支 100 Marco 出黎毒我, 呢次真係多得你地兩位唔少呀! :045: :045: :045:

比人毒完後, 再行前少少, 又竟然見到有村民用柴爐燒飯! 正呀! 隔離阿婆 d 飯, 真係香 d 架! :038: :038: :038:

同 村民傾幾句後, 大隊又再上山, 途經在山上望見模達灣水清見底, 正係好機會比小弟 practice 吓 用CPL既機會, 之後大家都覺得有 d 肚餓, 行多半個鐘, 約12:45左右, 大隊便回到索罟灣, 眾人便係該處食 d 小食如花生, 魚旦, 雞屎滕茶果等充機, d 雞屎滕茶果真係好正架! :great:

大家掃完一輪街後, 便行去榕樹灣. :love_china:

由索罟灣行去榕樹灣, 竟然又要上山落山, 妄煮甩底對我地黎講係壞事, 但對佢黎講可能係好事! :coldsweat2: :coldsweat2: :coldsweat2:

當上到最後一個高點, 嗰處又有一個涼亭, 小弟到步後, 又聽到又需要出動急救包既求救信訊號. :a005:

原來該位女隊友, 另一隻鞋大叫肚餓呀! 個口可以開到好似暴龍咁大! :what: :what: :what:

好 在當中有隊友立制攞條粗丈根出黎, 沽住小鞋仔把口, 當係涼亭後影完團照, 我地便向阿婆豆腐花店前進, 而好幾位隊友如方中信既 friend, lhk, yan yan, yan so, 及女同事等, 亦先行幾廿步, 包上風車山, 睇一睇架風車, 而其餘隊友就先去食阿婆豆腐花, 在等侯上風車山既隊友歸隊前, 小弟同 Michael 便係附近既農地同個阿伯吹吓水, 阿伯非常之好人, 教我地點樣簡菜同煮菜, 回到豆腐花店時, 見到先前同佢玩過既貓仔, 如嘆咁坐咗上車厘子小姐既玉腿上, 好 cute 呀! :inlove2:

無幾耐 lhk, yan yan 等便歸隊, 趁佢地等食豆腐花時, 我地便 hea 吓 hea 吓咁行去榕樹灣, 無幾耐, 所有人又歸隊, 入到榕樹灣, 當中又有隊友忍唔住, 要食返串串燒, 方中信亦請咗小弟食咗一串牛肉串燒, 好正呀! 多謝信信! :011: :011: :011:

之後大隊便係一間味到 ok, 但貴夾唔抵既 fu fa late lunch, 各位真係唔好意思呀! :eusa_wall: :eusa_wall::eusa_wall: :selfpun: :selfpun:

食完 late lunch 後, 我地便坐 5pm 船返去中環, 係船程中, Michael 又攞佢既 headphone 出黎毒小弟. :a002:

到 5:25pm 左右, 船巳抵達中環碼頭, 各人係碼頭外, 吹咗幾分鐘水, 便抱着一個行咗10公里又上山又落山頗疲倦既身驅各自回家.

多謝咁多位行山隊友參加尋日呢個咁開心既行山活動! :sorry: :sorry: :sorry:

多謝方中信同佢既 friend 協助帶路, 多謝 Michael 幫手影團照, 多謝 Bono 幫手買豆腐花, 多謝 Gundam 幫我影咗唔少相, 同埋要多謝所有機佬毒害小弟! :011: :011: :011:

Report Pencil! :selfpun: :selfpun: :selfpun:

 

東平洲環島遊

Sunday, November 23rd, 2008

[Fun Hiking 十一月號 – 第二炮] 11月23日 東平洲環島遊

各位行山隊友及有興趣參加既朋友: 來緊11月23日既行山團, 我地會去東平洲環島遊

由於小弟想帶給大家有一個比較有彈性既行程, 小弟現正考慮租船從馬料水碼頭往返東平洲, 及有可能在船上為大家安排自助午餐既關係, 小弟十分之需要在短時間內知到實際參加東平洲環島遊的總人數, 所以之前有參加過行山團既隊友, 及之前有報過名行山但又去唔到既朋友, 請於儘快或於今個星期四的下午5點正前, 在 [Confirmation List] 下面的人名名單內, 或經 PM / email, 確認是否參加.

至於之前未報過名參加行山團既朋友, 我地亦一樣歡迎你在 [新加入名單] 下面報名參加, 但請你地在報名時, 一定要確認可以參加, 同埋一定要 PM 你既名, 手提電話號碼, 及電郵地址給小弟, 如只在[新加入名單]內加上你個名而又唔 PM 你既資料比小弟, 你既報名一律不會受理, 多謝合作!

行山路線: 平洲環島郊遊徑
行山日期: 11月23日 (即下個星期日)
集合時間: 暫定為上午8點半
集合地點 : 暫定為馬料水碼頭
起點: 東平洲碼頭
終點: 東平洲碼頭
來回船程: 約3小時
行山時間: 約3小時
地道美食:坪洲士多

預計全天所需時間: 由上午8點半至晚上6點45分

由馬料水碼頭往返東平洲碼頭, 如不租船, 所需費用: $80/人
如租船由馬料水碼頭往返東平洲碼頭 + 自助午餐, 所需費用: TBA
前往馬料水碼頭方法:
1. 可由大學火車站步行至馬料水2號碼頭(約15分鐘)
2. 可於沙田火車站(B出口轉左),步行斜路往乘綠色專線小巴27號前往馬料水渡輪碼頭(終點站為香港科技園)

行山路線圖:


« of 2 »

團長後記:

首先多謝各位尋日參加 Fun Hiking 既東平洲環島遊. :sorry: :sorry: :sorry:

尋 日早上, 我地一行17人分別於8點半左右到達馬料水碼頭集合, 原來假日真係有好多人去東平洲, 我地咁多人, 如果唔提早 d訂飛, 同埋早少少去到碼頭, 真係分分鐘有人冇得上船, 幸好多謝各位合作, 我地成班嘩鬼個個都上到架船, 而船亦準時於9點開出向東平洲出發.

係船上, 我地各人都有講有笑, 完全感覺唔到有任何人有暈船浪既問題, 所以因為怕暈船浪而冇參加今次東平洲環島遊既朋友, 你地走寶了.

小弟真係冇認錯人, 原來小弟係好幾年之前, 巳經同 DonDon 見過面, 大家仲一齊係同一隻船內相處咗十日八日, 尋日見返呢個舊相好, 真係好開心! :inlove2: :inlove2: :inlove2:

經過1.5小時既船程, 我地終於到達東平洲了! :clap2hands :clap2hands :clap2hands

突然記起, 話說尋日係坐船期間, 同紅葉談起中國既語言, 原來古時 d 人好多都係講廣東話, 唔怪得用廣東話讀唐詩比起用普通話讀較流暢, 而我亦趁機問佢個 “囧” 字點讀, 依家我終於知點讀啦! 紅葉兄, 果然係一個文人! :great: :great: :great:

好 了! 當我地到達東平洲後, 由於起點人山人海, 我地擾攘咗一段時間約11點先開始行[平洲環島郊遊徑], 行咗數分鐘, 我地便係一個石灘取景影 Group Photo, 呢次由 askaseed 負責, 嘩! 支鏡好勁呀! 幅相影都個個都好靚仔靚女! 呂良偉同方中信好 Man 呀! :001: :001: :001:

之後, 由富仔, 盲俠, 阿良, DD, Bono 等帶頭行, 我地經過一個廢墟, 其間小弟見到有唔少廢人係處影廢墟, 再過無幾耐, 我地到達天后宮, 係等侯其餘幾位隊友到達前, 當中竟然有人係天后宮門前大講痾屎, 真係有辱天后娘娘呀! :patpat1:

人齊之後, 我地沿岸邊石灘行, 沿途天然石景壯觀, 紅葉問我覺唔覺得好似身處火星, 我自己都有d 呢種感覺, 可惜東平洲屬保護區, 如果唔係尋日我巳經執咗好多石頭及貝殼返屋企. :ebsmile:

行到去更樓石, 係石崖邊望出去, 真係好正! :a012:

人齊後, 我地就沿小路行, 當時紅葉問我, 遠望海邊又黑又濕既石灘嗰邊係咪難過水, 我當時都有 d 懷疑 , 冇理由難過水真係咁 challenging 呱? 點知當我地向小山向上行時, 才發現海邊又黑又濕既石灘嗰邊真係難過水, 不過算啦! 我地一行成17人, 行難過水唔多唔少都有 d 風險, 因為嗰時成12點幾, 巳開始潮漲. 到行到上小山頂時, 聽到崖下 d 浪打到澎澎聲, 我都慶幸大家冇行難過水. :ebsmile: :ebsmile: :ebsmile:

我地沿住小路係小山崖上行時, 阿妄煮話我地呃佢話唔使點上山, 我冇心呃你架, 因為之前我地都冇人黎過, 睇地圖條路線真係只睇到沿岸行吧! :sorry: :sorry: :sorry: :ebsmile: :ebsmile: :ebsmile:

話時話, 阿 7, 狀態越來越掂, 可以行鳳凰山之日, 不遠巳! :great: :great: :great: :love_china: :love_china: :love_china:

到我地去到斬頸洲後, 紅葉同妄煮就知由捷徑走回坪洲士多, 而小弟, Bono, 阿7, Gundam, 富仔, askaseed, lhk, DD, 阿6, 及其他隊友, 一行15人, 又沿着原本路線行, 臨尾一段係沙灘, 眾人懷看既興奮又肚餓既心情, 行完成個島, 最後到達坪洲士多跟紅葉同妄煮會合, 然行共進一個美味午餐. :eat: :eat: :eat:

:eat: 完午餐後, 有好幾位隊友中飯毒 :044: 咗一陣, 阿6, DD, 妄煮及富仔就鋤大D, 紅葉, Bono, 及阿7同佢d 朋友等, 就係處圍觀, askaseed 同佢個好朋友就去咗影相.

到約下午4點, 士多阿姐同我講話有船早走, 我地17人又剛剛好趕得及上呢一班船, 真係正正! 而於5:45pm, 我地終於返到馬料水碼頭, 眾人依依不捨咁各自歸家! :hello: :hello: :hello:

尋日真係行得好 happy, 風景正, 隊友又搞笑, 多謝各位隊友參加! :sorry: :sorry: :sorry: :modlaugh: :modlaugh: :modlaugh:

 

索罟灣到模達灣

Friday, April 23rd, 2004

從索罟灣到模達灣,再折回索罟灣。

起點: 索罟灣
終點: 索罟灣
行程: 1 小時
里數: 2 公里
難度: 1 星級,平路易走
時間: 2:00 pm
領隊: 韋信
地道美食:索罟灣海鮮酒家


南丫島環島遊

Sunday, January 4th, 2004

索罟灣起步繞行菱角山一週,返回索罟灣後再向榕樹灣進發。途中不單可欣賞菱角山奇岩異石,也可漫遊東澳、石排灣、榕樹下村、洪勝爺灣及模達灣等。

集合地點: 中環港外線四號碼頭
起點: 索罟灣
終點: 榕樹灣
行程: 4 小時
里數: 9 公里
難度: 1 星級,路段容易。
時間: 9:15 am
領隊: 韋信
團員: 韋信、琪琪、龍
地圖: 地圖連結
參考圖片: 圖片連結
地道美食:建興阿婆豆花、民豐海鮮酒家


« of 3 »

大澳至東涌

Saturday, February 1st, 2003

集合地點: 東涌東薈城
起點: 東涌炮台
終點: 大澳
行程: 4 小時
里數: 12 公里
難度: 1 星級,大部分石屎路
地圖: 地圖連結
地道美食: 深屈灣坤叔士多

 

Subscribe to RSS feed